Македонската репрезентација вечерва на „Планет Груп“ арената во Гент го одржува последниот тренинг пред одигрувањето на квалификацискиот дуел против Белгија, кој е на програмата утре со почеток во 20:45 часот.
Напаѓачот Александар Трајковски е единствениот во македонската репрезентација кој е без клуб. Сепак, на него сериозно смета селекторот Благоја Милевски.
„Белгијците сега знаат против кого играат. Сметам дека сега ќе имаат поголем респект кон нас. Мислам дека притисокот е врз нив. Ние секој натпревар го играме исто, се подготвуваме на ист начин. Нормално е како тече циклусот да се зголемува и притисокот, но треба да го тргнеме на страна и да одиграме како што знаеме и да обидеме да стигнеме до добар резултат“, изјави Трајковски.
„Сепак, мислам дека ова ќе биде добар натпревар и дека нема да им биде лесно ниту на нив. Како што доаѓа крајот на квалификациите притисокот расте, исто е за нив и за нас. Ова ќе биде една од поважните средби која може да го реши патот во финишот на циклусот. Белгија, без разлика на генерацијата, секогаш е силна, произведува добри играчи и не случајно е таму каде што е“, заврши репрезентативецот.
