Црногорските медиуми вчера објавија дека поранешниот репрезентативец на Македонија, Виктор Треневски, ќе биде тренер на Партизан. Црно-белиот клуб во неделата му врачи отказ на Срѓан Благојевиќ, по елиминацијата во Купот од второлигашот Мачва и дебаклот во првенството од Чукарички.
Треневски моментално е тренер на третолигашот Балкан Иглс од Црна Гора, инаку е поранешен играч на Партизан помеѓу 1995 и 1998 година со кој освои две шампионски титули и куп.
„За мене, како и за повеќето, ова е добра вест што ја прочитав, но за жал останува само тоа, бидејќи немаше контакт со луѓето од Партизан“, рече Виктор Треневски за Спортски Журнал.
Доколку во наредните денови добиете покана, дали би ја прифатиле?
„Тоа би ми било голема чест. Би им рекол на луѓето од Партизан да ми дадат два дена, бидејќи би пешачел до Белград. Кога станува збор за мојот сакан клуб, ништо не би ми било тешко. Со едни бебиња играв во Хумска и верувајте ми, би сакал да работам со овие бебиња, бидејќи мислам дека имаат голем квалитет. Се надевам дека ќе пораснат со мене“, рече Треневски.
Досега Треневски беше тренер на Партизан Бар, Грбаљ, Драва, Ком, Дечиќ, Работнички и Заврч, додека моментално е главен тренер на Балкан Иглс, тим кој се натпреварува во третото ниво на црногорскиот фудбал.
За репрезентацијата на Македонија одигра 17 натпревари без постигнат гол.
