УЕФА го суспендираше играчот на Бенфика, Џанлука Престиани, за натпреварот против Реал Мадрид поради инцидентот во првиот меч од плејофот на Лигата на шампионите што го имаше со Винисиус Жуниор.
„Кралскиот клуб“ славеше со 1:0 со голот на Винисиус во првиот натпревар од плејофот на Лигата на шампионите, а Бразилецот беше еден од актерите во скандалот што следеше по голот. Имено, како што тврди Реал, Винисиус бил расистички навредуван од Аргентинецот на Бенфика, Џанлука Престиани.
Како што тврди Винисиус, како и Килјан Мбапе, 20-годишниот Престиани, кој во тој момент го навлече дресот преку уста, неколку пати го нарекол Бразилецот „мајмун“.
Престиани напиша во официјален извештај дека го нарекол Винисиус „педер“ (homo), а не „мајмун“ (mono), а УЕФА брзо реагираше и го суспендираше Аргентинецот за најмалку еден натпревар, поради хомофобична навреда.
Престиани не може да игра во Лигата на шампионите додека не заврши истрагата, а доколку се докаже дека навистина расистички го навредил Винисиус, може да добие суспензија од 10 натпревари. Но, тоа ќе биде тешко за докажување со оглед на недостатокот од докази и само спротивставените изјави и многу сомнителното тврдење на Мбапе, кој според снимките воопшто и не слушнал што било кажано.
Бенфика не само што на реваншот в среда ќе биде без Престиани, туку и без тренерот Жозе Мурињо, кој на истиот натпревар доби два жолти картони и е автоматски суспендиран.
