Македонската репрезентација со петарда го совлада аутсајдерот Лихтенштајн, а Елиф Елмас постигна преубав гол дриблајќи неколкумина играчи, но УЕФА голот му го заведе како автогол на голманот.
Македонија тешко доаѓаше до шанса поради бункерот што го играше Лихтенштајн, па во 15-тата минута Елмас одлучи сам да се обиде да го пробие цврстиот бедем пред гостинскиот гол. Од десно дриблајќи еден по еден противнички играч влезе во шестнаесетникот каде продолжи со дриблинзите сѐ додека не дојде до голманот и упати удар тресејќи ја мрежата.
Голот на Елмас потсетува на слаломот на Горан Пандев против Јувентус од времето кога играше во Лацио. Но, иако голот беше пријавен како дело на Елмас, УЕФА потоа го промени во автогол на голманот Бенјамин Бихел. Точно е дека при шутот топката го погоди голманот в нога, но тоа е честа појава при голови и не се смета за автогол.
Во случајот на Елмас единствено логично објаснување е дека во УЕФА сметаат дека топката не одела в гол, па затоа допирот на голманот го менува правецот за да оди в гол и оттаму автогол.
Греота е ваков слалом на крајот да заврши без гол на Елмас, но последниот збор го има УЕФА. ФФМ има право да упати жалба за одлуката да биде сменета и Елмас да биде запишан како стрелец, а не како асистент како што е сега заведено.
Инаку, Македонија ја наполни мрежата на Лихтенштајн со голови во второто полувреме кога во листата на стрелци се запишаа и Енис Барди, Дарко Чурлинов, Лирим Ќамили и Лука Станковски.
