Дисциплинската комисија на УЕФА делумно ја прифати жалбата на Баерн и му ја намали казната на Колумбиецот Луис Диас.
Клубот од Минхен потврди дека Европската куќа на фудбалот одговорила на нивната жалба и му ја намалила казната на Луис Диас од три на два натпревара поради црвениот картон што го доби на натпреварот од Лигата на шампионите против Пари Сен-Жермен (2:1) на 4 ноември во главниот град на Франција.
Колумбиецот беше исклучен на крајот од првото полувреме во Париз кога грубо стартуваше врз Ашраф Хакими. Судијата доби повик од ВАР собата, го погледна видеото и го исклучи Диас.
Во тој момент, Баерн водеше со 2:0 со головите токму на Луис Диас и до крајот на натпреварот успеа да ја зачува победата и покрај тоа што имаше еден играч помалку во преостанатите 45 минути.
28-годишникот веќе отслужи еден натпревар суспензија, го пропушти натпреварот против Арсенал (1:3) во Лондон, а нема да може да игра ниту во вторник, 9 декември, против лисабонски Спортинг во Минхен.
Откако пристигна од Ливерпул ова лето за 60 милиони евра (45+15), Луис Диас се покажа како одлично засилување за „Баварците“. Досега одигра 20 натпревари во сите натпреварувања и постигна 12 голови со 6 асистенции.
