Во денешните два прволигашки натпревари лидерот Вардар оствари лесна победа над Арсими, додека Силекс се намачи дома со Башкими и не успеа да победи.
Многу полесно од очекувањата тимот на Вардар го скрши отпорот на Арсими, кој најрано од сите прволигаши ги почна зимските подготовки, веднаш по Новга година. Уште во шестата минута засилувањето од панчевачки Железничар, Цветковиќ, го отвори резултатот, а голеадата ја продолжија другите зимски засилувања Николов и Велковски. Пред паузата Босанчиќ се погрижи за водство од 4:0.
Во вториот дел на 5:0 зголеми Омерагиќ, а гостите од гостиварското село Чегране во судиското надополнување успеаја барем да го ублажат поразот со гол од пенал откако голманот Талески направи прекршок.
Со оваа победа Вардар го искористи вчерашниот пораз на Струга во Тетово и се одлепи на врвот на +4 во однос на стружани.
Во Кратово, екипата на Силекс се намачи со Башкими. Кумановци очигледно беа дојдено да останат непоразени и успеаја во тоа откако натпреварот заврши без голови. Голема шанса за победа имаа домаќините во судиското надополнување кога Ѓорге Џеков убаво биеше со глава, но голманот Амир Јашар одлично одбрани.
За Силекс ова е голем кикс уште на стартот од вториот дел бидејќи сега заостанува цели 7 бодови зад третопласираната Шкендија. Третото место на крајот на сезоната може да води во квалификациите за Конференциската лига, но само доколку во Купот триумфира една од екипите пласирани на првите две позиции. Башкими, пак, си освои важен бод во борбата за избегнување на местата што бодат во баражот за испаѓање.
Стадион „ФФМ Петар Милошевски“ во Скопје
Вардар - Арсими 5:1 (4:0)
Стрелци: 6' Стефан Цветковиќ, 20' Бобан Николов, 34' Дарко Велковски, 42' Немања Босанчиќ, 80' Азер Омерагиќ - 90'+3 (п) Ајрадин Цуцули
Црвен картон: 79' Мухједин Дардишта (А)
Главен судија: Фуркан Идризи (Тетово)
Стадион „Силекс“ во Кратово
Силекс - Башкими 0:0
Главен судија: Влатко Илиоски (Прилеп)
Потсетуваме, вчера Шкендија ја победи Струга со 2:0, а Тиквеш славеше над Шкупи со 6:0. Утре колото завршува со натпреварите Брера Струмица - Македонија ЃП и Пелистер - Работнички.
Табела:
