Женската екипа на Вардар две години по ред не успеава да влезе во првата лига сопнувајќи се на последната пречка - баражот.
Како второпласирани во второлигашката конкуренција, фудбалерките на скопски Вардар втора сезона по ред шансата за конечен пласман во елитното друштво мораа да ја бараат преку баражот против 9-то пласираната екипа од првата лига, Речица од Кумановско.
Во необичен термин во 11 часот утрово на Тренинг-центарот „Петар Милошевски“ во Ново Лисиче се одигра бараж натпреварот на кој вардарки немаа решение за разиграната седмица на Речица, Емили Митковска. Уште во 47. секунда таа го отвори резултатот, за набрзо и да го дуплира водството. Вардар се врати во игра со голот на Јанковска на средината од првиот дел, но Митковска во второто полувреме со нови два гола ѝ обезбеди опстанок на Речица.
Тренинг-центар „Петар Милошевски“ во Скопје
Речица - Вардар 4:1 (2:1)
Стрелци: 1′, 7′, 46′ 76′ Емили Митковска - 26′ Теодора Јанковска
Главен судија: Вјолца Изеири (Гостивар)
Убедливата победа на последнопласираната екипа во првата лига (не испадна директно затоа што пред почетокот на сезоната една екипа се откажа од натпреварување) над второпласираната во втората лига, која до самиот крај се бореше за првото место и која доминираше во натпреварите со останатите второлигаши завршувајќи со гол-разлика 80:9, само говори колку огромна е разликата во квалитетот дури и меѓу послабите прволигаши споредено со оние од втората лига.
Само за споредба, Речица сезоната во првата лига ја заврши со 3 победи, без реми и 21 пораз со гол-разлика од неверојатни 23:126, односно -103!
