Сè е подготвено за најголемиот фудбалски спектакл во историјата на најважниот спореден настан во светот. Три земји домаќини, 48 репрезентации, 12 групи, врвни стадиони и повеќе од еден месец најдобар фудбал ветуваат незаборавно првенство. Очите на целата планета ќе бидат насочени кон Канада, САД и Мексико, каде што вечерва започнува Светското првенство 2026.
Првиот натпревар ќе се игра на легендарниот стадион „Астека“ во Мексико Сити помеѓу Мексико и Јужна Африка. Директен пренос од 21:00 часот ќе оди на новиот канал Арена спорт МК 1 со коментар на македонски јазик. Претходно од 20 часот ќе биде свеченото отворање.
Токму од ова иконско место во светот на фудбалот започнува битката на 48 репрезентации за највредниот трофеј во светскиот фудбал. Тоа ќе биде првиот од вкупно 104 натпревари што ќе ги играат 48-те репрезентации низ Канада, САД и Мексико во текот на следните 39 дена. Големото финале е закажано за 19 јули на стадионот „МетЛајф“ во Њујорк.
Бранителот на титулата Аргентина, предводена од Лионел Меси, е меѓу главните фаворити, заедно со европскиот шампион Шпанија и светскиот вицешампион Франција.
Шпанија доаѓа во Северна Америка со големи амбиции. Генерацијата предводена од младата ѕвезда Ламин Јамал сака да го повтори успехот од 2010 година и да ја освои втората светска титула. Екипата на Луис де ла Фуенте ја задржа својата препознатлива техничка игра, но стана многу поспецифична и поопасна во завршницата.
Франција повторно има еден од најсилните состави на турнирот. Килјан Мбапе, Усман Дембеле, Маркус Турам, Рајан Шерки и Мајкл Олисе предводат исклучително моќен напад, додека селекторот Дидје Дешан се стреми да стане првиот тренер по речиси еден век што двапати го освоил Светското првенство.
Аргентина ја брани титулата од Катар. Иако на турнирот Меси ќе го прослави својот 39-ти роденден за време, тимот на Лионел Скалони влегува во првенството со самодоверба по доминантната квалификациска кампања. Со Лаутаро Мартинес, Хулиан Алварес и мноштво други квалитетни играчи, „Албиселесте“ веруваат дека можат да освојат уште една светска титула.
Португалија е исто така меѓу фаворитите. Кристијано Роналдо има можност да напише нова страница во историјата како прв играч кој постигнал голови на 6 различни Светски првенства. Покрај него, Португалците се потпираат на исклучително квалитетен среден ред и самодовербата стекната од освојувањето на Лигата на нации.
Бразил ќе се обиде да ја врати поранешната слава и да стигне до својата шеста мундијалска титула. Под водство на искусниуот италијански стратег Карло Анчелоти, „Селесау“ сметаат на Винисиус Жуниор, Нејмар и искусните дефанзивци Маркињус и Габриел Магаљајс.
Англија повторно сонува за трофеј што го чека од 1966 година. Селекторот Томас Тухел направи неколку смели потези при составувањето на тимот, а најголемите надежи ги положи на Хари Кејн, Џуд Белингам и Букајо Сака.
Тука е и фаворитот од сенка Холандија, за која многумина предупредуваат дека може да изненади. По три порази во финалињата (1974, 1978 и 2010), „Оранје“ важат за најбаксузната репрезентација на мундијалите. Со Мемфис Депај, Дензел Думфрис, Вирхил ван Дајк, Тиџани Рејндерс, Дониел Мален и другите, Холанѓаните имаат состав со кој можат да стигнат дури до крајот.
Мароко, исто така, привлекува големо внимание, бидејќи се стреми да го продолжи својот историски подем што започна со пласманот во полуфиналето на претходното Светско првенство. Предводени од Ашраф Хакими, Мароканците веруваат дека можат да станат првиот африкански тим што ќе игра во финале на еден Мундијал.
Од другите репрезентации што можат да изненададат и да стигнат далеку, иако не и до самото финале, тука се Шкотска со Скот МекТоминеј, Џон МекГин и Енди Робертсон, Норвешка со Ерлинг Халанд, Мартин Едегор и Александер Серлот и Сенегал со Садио Мане, Никола Џаксон и Калиду Кулибали. Секако, на Мундијалите секогаш имало и некоја репрезентација што сите ја отпишале, а одиграла одличен турнир, па можеби сега тоа ќе би биде Зелен 'Рт, ДР Конго, Узбекистан, Ирак, Босна и Херцеговина, Канада...
Дури 4 репрезентации ќе запишат деби настап на мундијалите и тоа Јордан, Узбекистан, Курасао и Зелен 'Рт. Од друга страна, некои се враќата по долго отсуство. Хаити и ДР Конго по 52 години од нивното деби учество во 1974, Ирак 40 години (1986), Норвешка, Австрија и Шкотска 28 години (1998), Чешка 20 (2006), а Парагвај и Нов Зеланд 16 години (2010).
По години исчекување, најголемиот фудбалски настан конечно започнува. Навивачите ширум светот можат да очекуваат повеќе од еден месец врвни натпревари, големи емоции и борба за пехарот на ФИФА за кој сонува секој фудбалер.
