Легендарниот италијански фудбалер Џанлука Ѕамброта се соочува со неочекуван и необичен проблем кој бара операција, а откри сѐ за време на гостувањето во поткастот „BSMT“.
Ѕамброта (48) остави многу длабока трага во европскиот фудбал, освојувајќи трофеи со гиганти како Милан, Барселона и Јувентус. Токму во „Старата Дама“ остави најголема трага, но неговиот успех во кариерата секако е освојувањето на светската титула со Италија на Мундијалот 2006 во Германија.
Фудбалерот кој запиша 98 настапи за италијанската репрезентација, во текот на кариерата го привлекуваше вниманието поради закривените нозе. Таквите нозе тогаш ги воодушевуваа навивачите, веројатно му ја олеснија фудбалската кариера, но во пензија му носат големи проблеми.
Сега како гостин во поткастот зборуваше за овој негов феномен кој се претвори во проблем и кој ги изненадил дури и лекарите.
„Во текот на мојата кариера поради тоа немав поголеми повреди. Денеска сум лабораториски модел за многу хирурзи и лекарите со изненадување ме прашуваат како проблемот се влошувал со текот на времето, како поради одредена генетика, така и поради фактот што немам внатрешни менискуси“, објасни Ѕамброта.
Одличниот крилен напаѓач продолжи да зборува за својот проблем, откривајќи дека мора да оди на операција и дека ќе му бидат исечени делови од коската.
„Наскоро ќе ги оперирам двете колена. Бев кај три-четворица од најдобрите хирурзи во земјата и не можат да ми објаснат како имам вакви колена и како можам да правам физички активности како падел (вид спорт кој се игра со рекет, сличен на сквош, заб. на прев.)“, вели Ѕамброта, за потоа детално да дообјасни:
„Морам да направам остеотомија. Во основа, тие ќе ми ги исправат нозете со сечење делови од коската горе и долу и ставање плочи за да ме спречат да имам тотална протеза, иако такво нешто ќе морам да вметнам во наредните години“, додаде Ѕамброта.
Ѕамброта ја заврши својата многу успешна кариера во 2014 година во швајцарски Кјасо. Освен за гигантите Милан, Јувентус и Барселона, играше и за Бари и Комо. По завршувањето на играчката кариера кратко време беше тренер.
