Бројот 77 е број еден: Дресовите на Лука Дончиќ се најпродавани во НБА

Одлуката на Лос Анџелес Лејкерс да го замени Ентони Дејвис за Лука Дончиќ донесе придобивки на спортски план, бидејќи Лејкерс стигнаа до третото место во регуларниот дел од сезоната на Западот, но и финансиски, бидејќи дресовите и маичките на Словенецот со бројот 77 се најпродавани во НБА оваа сезона.

По 11 години Дончиќ ги симна од тронот Стеф Кари и Леброн Џејмс, чии дресови и друга опрема беа најмногу продавани. Асот на Голден Стејт Вориорс е втор по популарност, трет е Кралот Леброн, а Никола Јокиќ официјално е на 10-тото место.

„Лука Дончиќ е новиот топ продавач на дресови во НБА ... и првиот играч кој не се вика Стивен Кари или Леброн Џејмс кој продал најмногу дресови во НБА во една сезона од 2012/13 ... и првиот интернационалец кој ја води лигата“, напиша новинарот Марк Стеин.

NBA Store не само што објави точно колку дресови продал Дончиќ и колку заработил, туку и дека маичките се движат од 32 до 39 евра, а дресовите (жолт, бел и син) од 69 до 113 евра.

Лос Анџелес Лејкерс се најпопуларни на социјалните мрежи, клиповите на Леброн Џејмс собраа 3,23 милијарди прегледи, а на Дончиќ 1,82 милијарди. Втор најпопуларен е Стеф Кари со 2,56 милијарди прегледи.