Сопственикот на грчкиот гигант Панатинаикос, контроверзниот милијардер Димитриос Јанакопулос, ја шокираше кошаркарската јавност со својата изјава дека се обидел да го донесе во Европа трикратниот МВП на НБА, српскиот центар Никола Јокиќ.
Гостувајќи во поткастот „Euro Insiders“, Јанакопулос, чија нето вредност се проценува на 1,9 милијарди долари, откри дека навистина испратил формална понуда до Денвер Нагетс. Неговиот план бил да го откупи договорот на 31-годишниот центар и да го доведе во Атина оваа сезона.
„Луѓето ќе речат: 'Добро, сега се шегува'. Но, всушност испратив многу сериозна понуда оваа година, и до неговиот тим и до него лично. Ме одбија“, призна Јанакопулос.
Грчкиот бизнисмен мислеше дека Јокиќ влегува во последната година од договорот, па се обиде да ја нападне американската франшиза. Неговиот опис на реакцијата од Денвер е апсолутен хит и најдобро илустрира како НБА го доживеа овој неверојатен потег.
„Кога прашав, тој имаше тековен договор. Мислев дека му е последна година и се обидов да го откупам. Им требаа само неколку секунди да речат: 'Кој? Грција? Каде? Што? Довидување“. Но... да почекаме следната година“, додаде оптимистично сопственикот на Зелените.
Иако Јанакопулос беше подготвен да го одврзе кесето, враќањето на српскиот кошаркар во Европа во овој момент е апсолутна научна фантастика. Технички, Јокиќ има уште две загарантирани години од договорот со Денвер, додека сезоната 2027/2028 е оставена како негова опција (player option). Само оваа сезона, Јокиќ треба да заработи 59 милиони долари, а следната година неверојатни 62,8 милиони долари.
Засега, навивачите на Панатинаикос - чиј состав вклучува поранешни НБА играчи како што се Кендрик Нан, Хуанчо Ернангомес, Џериан Грант и Гершон Јабуселе - можат само да сонуваат за такво сензационално сценарио.
Од друга страна, Јокиќ, кој во последните две сезони имаше просек од трипл-дабл, ќе продолжи да доминира на американските терени во дресот на Нагетс.
