Детроит со чудесен пресврт прв пат по 18 години мина плејоф серија

Синоќа Детроит Пистонс го победи Орландо Меџик со 116:94 во седмиот натпревар од првото коло од НБА плејофот и за прв пат по 18 години помина една серија од плејофот.

Кејд Канингем го предводеше Детроит со 32 поена и 12 асистенции, додека Тобиас Харис додаде 30 поени. Паоло Банкеро го предводеше Орландо со 38 поени, но немаше поддршка од остатокот од тимот.

Пистонс направија голем пресврт во серијата откако заостануваа со 3-1, станувајќи 15-ти тим во историјата на НБА што направил таков подвиг. Во наредната рунда ќе играат против Кливленд Кавалирс, кој го елиминираше Торонто Репторс.

Канингем по натпреварот изјави дека тимот го пронашол одговорот во враќањето на својата препознатлива игра.

„Бевме до крајни граници. Тоа нè принуди навистина да размислиме како игравме, што нè доведе до оваа точка и зошто победивме на толку многу натпревари во регуларната сезона. Тоа нè врати во кошарката што знаеме дека сме способни да ја играме“, рече Канингем.

Детроит Пистонс пооследен пат мина рунда во плејофот во сезоната 2007/2008!

Тренерот на Детроит, ЏејБи Бикерстаф, ја нагласи својата доверба во тимот по уште еден камбек, потсетувајќи дека Пистонс исто така надоместија дефицит од 24 поени во шестиот меч во Орландо.

„Тоа е очекувано. Имаме толку многу доверба во оваа група. Ова е посебна група и не можете да нè отпишете.“

Харис постигна 17 поени во втората четвртина, а Детроит го сврти резултатот на 60:49 до полувремето. Домашниот тим потоа го отвори третиот период со серија од 11:2 и отиде на 71:51, што практично го реши прашањето за победникот. Џејлен Дурен, исто така, даде важен придонес со 15 поени и исто толку скокови, негов прв дабл-дабл настап во оваа серија.

Дека оваа сезона како никогаш досега се очекуваше Детроит да го прекине овој долг пост покажуваше пласманот во регуларниот дел од сезоната каде Пистонс беа убедливи лидери на Истокот со скор од 60 победи и 22 пораза. Орландо, пак, заврши осми со скор 45-37 и преку плејинот се избори за дуел со Пистонс.