Голден Стејт Вориорс го победија Лос Анџелес Лејкерс на гости со 123:116 во најинтересниот натпревар во НБА вечерта. Тоа беше четврта последователна победа за Вориорс, кои го држат петтото место на Западот со 45 победи и 31 пораз, додека Лејкерс се чекор погоре со 46-30.
Гостите поведоа на крајот од првата четвртина и не го испуштија водството до крајот на мечот. Во некои моменти имаа и 16 разлика. На четири минути до крајот Лејкерс ја намалија негативата на пет поени (100:105), но Вориорс брзо избегаа на +10 и го приведоа мечот кон крајот.
Стивен Кари го предводеше победничкиот тим со 37 поени, додека Брандин Поџиемски додаде 28 со осум постигнати тројки во кариерата. Џонатан Куминга постигна 18 поени, а Џими Батлер седум од своите 11 поени во последната четвртина.
„Се обидовме да го подигнеме нивото на игра за да се подготвиме за плеј-офот. Знаеме дека секој натпревар е важен. Интензитетот беше луд, но тоа е она што го сакаме, нешто за што треба да играме и да работиме, тоа е дефинитивно нешто посебно", изјави Кари за телевизијата TNT.
Кај домаќините се истакнаа Леброн Џејмс со 33 поени и девет асистенции и Остин Ривс со 31 поен. Лука Дончиќ постигна 19 поени со шут за тројки 0-6, со што ја прекина серијата од 114 натпревари по ред во кои погодуваше тројки.
На крилата на големиот Јанис Адетокунбо, Милвоки Бакс на гости ја совладаа Филаделфија 76ерс со 126:113. Адетокунбо натпреварот го заврши со 35 поени, 20 асистенции и 17 скока. Брук Лопес додаде 17 поени, а Кајл Кузма 16.
Кај домаќините, кои беа без шест играчи, меѓу кои Тајрис Макси, Џоел Ембиид и Пол Џорџ, се истакна дебитантот Адем Бона со рекорд во кариерата од 28 поени при шутирање 13-15. Квентин Грајмс постигна 24 поени со 10 асистенции, а Гершон Јабуселе додаде 22 поени. Бакс се петти на Истокот со 42 победи и 34 порази, додека Сиксерси се 13-ти на Истокот со 23-54.
Победа на гостински терен оствари и Орландо кој го совлада Вашингтон со 109:97 и со тоа му го нанесе 60-от пораз сезонава. Најефикасен во тимот на Меџик беше Паоло Банчеро со 33 поени, 18 скока и осум асистенции, додека Франц Вагнер додаде 27 поени.
Во тимот на Вашингтон најефикасен беше Буб Карингтон со 32 поени, девет скока и седум асистенции. Орландо е седми на Истокот (38-40), додека Визардс се последни со 17 победи и 60 порази.
