Лука Дончиќ ноќеска за прв пат заигра во дресот на Лос Анџелес Лејкерс во Далас, а пречекот и збогувањето што ги доби од салата ќе влезе во историјата на НБА.
Дончиќ изненадувачки беше трејдуван од Далас во Лејкерс пред два месеца, а навивачите на Маверикс го обвинија генералниот менаџер Нико Харисон за тој неразбирлив и штетен потег за клубот.
Дека сѐ уште мислат дека Дончиќ нема врска со тоа, покажаа и синоќа кога го пречекаа Лука како ниеден поранешен играч на нивниот клуб.
Сите навивачи во салата носеа маици со натпис на словенечки „Лука, фала за сѐ“ (Hvala za vse, Luka), а повеќето од нив донесоа и пароли за благодарност до Дончиќ.
Пред официјалното претставување на играчите, на големиот видео ѕид во салата беше прикажано триминутно видео во кое му се заблагодарува на Дончиќ за сѐ што направи за Маверикс во претходните седум години, а Лука не можеше да ги сокрие солзите додека ги слушаше овациите од трибините.
На официјалното претставување навивачите на Далас со громогласен аплауз го поздравија Дончиќ, дури погласен од нивните играчи, а потоа брилијантниот Словенец покажа магија на теренот.
Дончиќ брилјираше на теренот и мечот го заврши со дури 45 поени, 8 скокови и 6 асистенции.
Кај Лејкерс, Леброн Џејмс додаде 27 поени и 7 скокови, додека на другата страна Наџи Маршал постигна 23 поени и 8 асистенции.
На минута и пол пред крајот на натпреварот тренерот на Лејкерс, ЏејЏеј Редик, го извади Дончиќ од игра, а потоа сите гледачи станаа и ѝ аплаудираа на својата поранешна суперѕвезда.
Лејкерс со оваа победа обезбедија пласман во плејофот.
