Јанг дозна дека е разменет среде натпревар и замина во соблекувалната

НБА суперѕвездата Треј Јанг повеќе не е играч на Атланта Хокс. Еден од најдобрите играчи на Атланта беше официјално разменет синоќа и ќе ја продолжи својата кариера со Вашингтон Визардс.

Јанг дозна за размената на необичен начин. Веста беше објавена среде натпреварот помеѓу Атланта Хокс и Њу Орлеанс Пеликанс, а камерите ја снимија неговата реакција кога салата објави дека тој повеќе не е играч на Хокс.

По објавата, Јанг стана од клупата и го напушти теренот без да се збогува, упатувајќи се директно кон соблекувалната. Тој не воспостави контакт со своите соиграчи, но, според извештаите, отишол да се информира за деталите од размената. Сепак, подоцна се вратил во салата и го гледал крајот на натпреварот.

Атланта Хокс го испратија Треј Јанг во размена кај Вашингтон Визардс, додека искусниот СиЏеј Меколум и младиот Кори Кисперт пристигнаа во спротивна насока.

Јанг пристигна во Атланта како петти избор на НБА драфтот во 2018 година и го напушта клубот како рекордер по асистенции, како и играч со најмногу тројки во историјата на франшизата.

Тој беше четирикратен учесник во НБА Ол-стар, а неговиот најголем тимски успех дојде во 2021 година, кога ги предводеше „Јастребите“ до финалето на Источната конференција.

Тековната сезона беше обележана со повреди, поради кои Јанг одигра само десет натпревари, со просек од 19,3 поени и 8,9 асистенции по натпревар.