Никола Јокиќ вчера имаше причина за славење, а изгледаше како да го освоил прстенот на шампионската титула во НБА. Ова го пишуваат медиумите од Србија и Босна и Херцеговина во врска со настаните во Србобрана на традиционалната трка со коњи Петровден, каде што победи коњот на Јокиќ, Арагорн.
Иако е НБА ѕвезда и еден од најдобрите кошаркари во светот, Јокиќ, на свој карактеристичен начин, дојде на трката без гламур и помпезност. Камерите на телевизијата „Арена Спорт“ го фатија како се потпира на оградата пиејќи пиво, а потоа ја слави победата на Арагорн.
Наградата што ја доби е симболична. Според истиот портал, таа му донела парична награда во износ од 44.000 динари (околу 375 евра). Арагорн со возачот Владимир Прибиќ бил убедлив во трката долга 2100 метри. Според впечатоците на присутните, Јокиќ бил понервозен на хиподромот отколку што обично се гледа за време на НБА натпреварите.
Често се вели дека коњите, а не кошарката, се негова прва љубов. Јокиќ поседува неколку грла коњи.
