Бостон Селтикс и Голден Стејт Вориорс неочекувано се соочуваат со рана елиминација од плејофот на НБА по новите порази што ги доведоа нивните ривали на чекор до пласман во конференциско финале.
Њујорк Никс играат фантастично во плејофот и сега имаат водство од 3-1 во серијата против актуелниот шампион Бостон Селтикс.
Во четвртиот натпревар од серијата во нивниот „Медисон Сквер Гарден“, Никс го победија Бостон со 121:113, па имаат три меч-топки за пласман во финалето на Источната конференција.
Ниту 42-та поена на Џејсон Тејтум не беа доволни за Бостон. За жал, Тејтум се повреди по импресивната игра. Поточно, сè се случи три минути пред крајот кога беше изнесен од теренот во инвалидска количка, и прашање е што ќе со него во наредниот период.
Џејлен Брансон повторно беше феноменален за Њујорк со 39 поени, 12 асистенции и 5 скокови, додека Микал Бриџис и Карл-Ентони Таунс додадоа по 23.
Уште еден многу популарен и сакан клуб е пред испаѓање. Станува збор за Голден Стејт Вориорс, кој повторно беше поразен од Минесота Тимбервулвс.
Минесота победи како гостин со 117:110 и со тоа се здоби со предност од 3-1, што значи дека и тие имаат три меч-топки за конференциско финале.
Од самиот почеток на овој дуел беше јасно дека нè очекува вистинска драма, но вистинската лудост се случи во третата четвртина, кога одбраната на Вориорс целосно се распадна. Тимбервулвс го добија овој дел од натпреварот со неверојатни 39:17, со што ја обезбедија победата.
Џулиус Рендл со 31 и Ентони Едвардс со 30 поени ја предводеа Минесота до победа, додека Џонатан Каминга постигна 22 поена кај Голден Стејт.
Вреди да се напомене дека Голден Стејт е без својата најголема ѕвезда, Стеф Кари, поради повреда.
Резултати:
Њујорк Никс - Бостон Селтикс 121:113 (3-1)
Голден Стејт Вориорс - Минесота Тимбервулвс 110:117 (1-3)
