Шлаг на тортата на ЕвроБаскет: Турција и Германија вечерва играат за титулата

Четириесет и второто издание на ЕвроБаскетот дојде до самиот крај, а во вечерашното финале во Рига силите ќе ги одмерат Турција и Германија.

Со сигурност може да се каже дека долго време немавме двајца позаслужни финалисти на ЕвроБаскет, со оглед на тоа што двата тима го воодушевија светот со својата игра во текот на целиот турнир.

Двата тима досега победија на сите 8 натпревари на турнирот и, генерално кажано, покажаа привлечна кошарка.

Иако играат исклучителна одбрана, двата тима се карактеризираат со феноменален напад на ова првенство.

Германија е најефикасната екипа на турнирот, со просек од 101,4 поени по натпревар, додека Турците се трети со просек од 91,1 поен. Турција е најдобрата екипа за тројки на првенството, со 44,7 погодени шутеви за тројки, додека Германија е втора со 39%.

И двата тима имаат двајца клучни играчи околу кои се врти нивната игра. Турците се потпираат на Алперен Шенѓун (20,8 поени, 11 скокови и 7 асистенции во просек) и Охриѓанецот Џеди Осман (15,1 поен), додека Германците се потпираат на Денис Шредер (20,9 поени, 6,6 асистенции) и Франц Вагнер (21,1 поен, 5,6 скока), па ќе видиме кое дуо ќе биде подобро вечерва.

Што се однесува до „Х факторот“, тоа би можело да биде Ерџан Османи или Шејн Ларкин од едната страна, или Андреас Обст или Исак Бонга од другата, но не е исклучено некој друг да излезе од сенките и да стане неочекуван херој на финалето на ЕвроБаскетот.

Турските навивачи имаат големи надежи во фактот дека нивната репрезентација ја предводи еден од најдобрите европски тренери, Ергин Атаман, додека од друга страна, Германците не ги предводи тренерот Алекс Мумбра поради болест, туку му го предадоа тимот на неговиот помошник, Босанецот Алан Ибрахимагиќ, кој одлично ја заврши работата и го водеше тимот до медал.

Финалето на Евробаскетот ќе се игра вечерва во „Шаоми Арената“ во Рига, Латвија со почеток во 20:00 часот, по што ќе дознаеме дали Турција за прв пат ќе стане европски шампион во кошарка или Германија по втор пат во историјата. Германците беа шампиони во 1993 година и финалисти во 2005 година, додека Турците играа за злато само во 2001 година, кога беа поразени од Југославија.

Пред финалниот дуел, Грција и Финска ќе играат натпревар за третото место во 16:00 часот.

Двата натпревара ќе бидат емитувани во живо на каналите Arena Sport, финалето на Arena Premium 1, а мечот за третото место на Arena Premium 3.