Неуништливата Вон со 41 година славеше во Сент Мориц и влезе во скијачката историја

Линдзи Вон е неуништлива. Коленото ѝ откажа во 2019 година кога беше во најдобра форма, па направи пауза од пет години, доби титаниумска чашка, му се врати на скијањето минатата сезона и влезе во историјата на спустот во Сент Мориц.

Финалето го заврши за 1:29,63 минути, оставајќи ги зад себе Магдалена Егер (+0,98) и Мирјам Пунер (+1,16) и ја оствари својата победа број 83 во Светскиот куп, прва по седум години, односно од март 2018 година. Со оглед на тоа што има 41 година и 55 дена, стана убедливо најстарата победничка во историјата на скијањето.

Кралицата на спустот и супер-џи покажа дека неверојатната желба, упорноста, а секако талентот и искуството, можат да го направат невозможното возможно. Кога се искачи на подиумот како второпласирана во супер-џи во Сан Волио во март годинава, рече дека ќе се обиде да се подготви за Зимските олимписки игри, кои ќе се одржат од 6 до 22 февруари во италијанското одморалиште Кортина Д'Ампецо. 

И секако дека сака да се бори за медал. Сака да додаде уште еден медал покрај златото во спуст во 2010 година и бронзата во 2018 година, како и бронзата во супер-џи во 2010 година. Ако Олимписките игри во Сочи во 2014 година ги пропушти поради повреда, нема и оние во Италија во февруари. Првото место во Сент Мориц навестува медал во Италија.