Англичанецот Даниел Дубоа и Украинецот Олександр Усик ќе се соочат на 19 јули на стадионот „Вембли“ во Лондон за апсолутната титула светски шампион во тешка категорија, објави BBC.
Ова ќе биде нивна втора борба во која 27-годишниот Британец ќе се обиде да му се одмазди на 38-годишниот Украинец за поразот во борбата во август 2023 година во Вроцлав, Полска, која заврши со прекин во деветтата рунда.
Дубоа моментално го држи појасот за светски шампион во IBF, додека Усик ги поседува преостанатите три (WBA, WBO и WBC). Украинецот напиша ново поглавје во историјата на професионалниот бокс во мај 2024 година, кога го победи Тајсон Фјури и стана првиот апсолутен светски шампион во тешка категорија во „ерата на четири појаси“. Тој го победи Фјури уште еднаш во декември минатата година, но мораше да се откаже од титулата во IBF пред тој меч.
Така, Даниел Дубоа стана сопственик на тој појас, а ја одбрани доделената титула против својот сонародник Ентони Џошуа во септември 2024 година. Дубоа требаше повторно да ја одбрани таа титула во февруари во борба со Новозеланѓанецот Џозеф Паркер, но поради болест мораше да се повлече од борбата неколку дена пред таа да се одржи.
Дубоа го најави своето враќање: „Ова е борбата што ја сакав и ја барав, а сега имам шанса за одмазда. Требаше да ја добијам првата борба, но проценката на судијата ме спречи, па сега нема да ја повторам грешката пред моите луѓе на националниот стадион во градот каде што живеам“, рече Дубоа, додавајќи: „Сега сум подобар и поопасен, а Усик ќе се увери сам“.
Доколку успее, Дубоа ќе стане првиот британски боксер кој ќе ги обедини сите светски титули во тешка категорија во „ерата на четири појаси“.
Последниот Британец кој ги држеше сите три титули (три појаси) беше Ленокс Луис, кој ги постигна во 1999 година победувајќи го Евандер Холифилд во втората од нивните две борби, откако првата заврши нерешено.
Усик му се заблагодари на Бога што му даде можност повторно да се бори за апсолутната титула светски шампион и му рече на Дубоа: „Ти благодарам, Даниел, што ми го чуваше појасот на IBF - сега сакам повторно да го имам“.
