На вчерашниот нерешен натпревар од Европското првенство помеѓу Португалија и Норвешка се случи необичен потег со кој Португалците се обидоа да добијат предност.
Имено, при нерешен резултат 35:35, само 37 секунди пред крајот, португалскиот играч Мигел Невеш беше снимен како држи iPad на увото за време на тајм-аутот за да го прислушкува разговорот на норвешката клупа.
Португалецот им призна на новинарите по натпреварот што правел, а неговата предност беше тоа што го разбирал норвешкиот јазик.
„Играв во Норвешка три години, а мојата девојка е Норвежанка, па го зборувам и го разбирам јазикот. Се обидов да добијам мала предност и да дознаам што ќе прават. На тој начин можев да ја подготвам нашата одбрана“, објасни Невеш.
Сепак, Португалија на крајот не успеа да ги искористи информациите што ги доби, бидејќи Мартим Кошта промаши во последниот напад, како и Норвежанецот Симен Лисе на другата страна, што резултираше со нерешено 35:35.
Невообичаената ситуација беше забележана и во норвешкиот табор. Тобиас Грендал призна по мечот дека го видел Невеш за време на некои тајм-аути како стои со iPad и „го притиска увото на него“ веднаш до клупата, па се обидел да го помести микрофонот за да го ограничи она што може да се слушне.
„Го видов по неколку тајм-аути како стои со iPad, практично притиснат на увото. Имаме толку многу имиња и кодови за работи што не мислам дека е премногу опасно, но секако - можете да научите некои едноставни работи“, рече Грендал.
Ракометниот експерт Клаус Мелер Јакобсен од данската TV 2 Sport смета дека потегот на Португалија ја преминал границата на неспортско однесување и додаде дека нема да биде изненаден ако ЕХФ покрене постапка. Според него, фактот што Португалија не добила веднаш корист не ја намалува сериозноста на постапката, но ЕХФ само соопшти дека овој потег не го сметаат за фер-плеј.
Норвежаните исто така побараа објаснување од Европската ракометна федерација, а одговорот беше следниов:
„Во принцип, употребата на дигитална технологија (т.е. таблети) во просторот за замена е опфатена со прописите (член 23.8). Сепак, од страна на ЕХФ постои целосно неразбирање дека ваквите уреди, кои се наменети за поддршка на благосостојбата на играчите и се користат за тактички и тренерски цели, се користат на овој начин, и ние не сметаме дека тоа е во согласност со фер-плејот, ниту во интерес на играта“, напиша медиумскиот менаџер на ЕХФ, Томас Шенајх, во СМС-порака до TV 2 Sport.
Со нерешениот резултат и двете репрезентации се отпишаа од шансите за полуфиналето бидејќи на коло до крајот имаат недостижна негатива од Данска и Германија, кои со по 6 бодови се на првите две места.
