Поранешната шампионка на Вимблдон, Маркета Вондроушова, се соочи со една од најстрогите казни во нејзината кариера, откако Меѓународната агенција за интегритет во тенисот (ИТИА) ѝ изрече четиригодишна суспензија поради одбивање на допинг тест.
На 3 декември 2025 година чешката тенисерка одби да се подложи на тестирање, а за време на постапката не успеа да обезбеди доволно убедливи аргументи за да докаже дека не ги прекршила антидопинг правилата.
Според одредбите на Светскиот антидопинг кодекс и Програмата за антидопинг во тенисот, одбивањето или избегнувањето на давање примерок се третира на ист начин како позитивен наод, освен ако не се докажат посебни околности што би ја оправдале таквата постапка.
Трибуналот заклучи дека Вондроушова ги прекршила прописите, поради што е суспендирана 4 години. За време на суспензијата, таа нема да може да учествува на ниту еден професионален турнир, ниту на никаква активност организирана под покровителство на тениските институции.
Казната стапува на сила од датумот утврден од трибуналот, додека сите резултати постигнати по моментот на прекршокот ќе бидат поништени, заедно со паричните награди и освоените спортски награди. За време на постапката, Вондроушова ја изнесе својата верзија на настаните.
„Инспекторите дојдоа на мојата врата среде ноќ, не се претставија според прописите и не ги пуштив внатре. Во последните месеци бев под голем стрес поради разните закани што ги добивав преку социјалните мрежи“, рече Маркета Вондроушова.
26-годишната Чехинка ќе има 30 години кога ќе може да се врати на официјалните натпреварувања. Освен доколку во меѓувреме суспензијата не ѝ биде намалена. Вондроушова има право на жалба.
Оваа тенисерка триумфираше на Вимблдон во 2023 година, а играше финале на Ролан-гарос во 2019.
