Зверев отворено за менталната криза: Не наоѓам радост надвор од теренот, осамен сум

Александер Зверев испадна уште во првото коло на Вимблдон, но тоа не беше најтешката работа за третопласираниот тенисер во светот. Откако го напушти теренот, Германецот зборуваше повеќе, невидливо за јавноста, за контекстот на неговата изгубена битка против Французинот Артур Риндеркнеш.

Може да се каже дека си ја отвори душата на средбата со „седмата сила“, без никакво двоумење или срам (а зошто би имал?!) откривајќи ги деталите за менталната криза низ која минува во последно време. Со надеж дека наскоро ќе најде излез од тоа мрачно царство.

„Никогаш порано не сум се чувствувал толку празно. Понекогаш се чувствувам многу осамено. Се борам. Психички, велам дека се мачам уште од Австралија опен. Едноставно не знам... Се обидувам да најдам начини да излезам од оваа дупка. И постојано се наоѓам повторно во неа. Едноставно се чувствувам доста осамено во животот во моментов, што не е убаво чувство“, објасни Зверев.

Најдобро рангираниот на АТП листата по Јаник Синер и Карлос Алкарас, е подготвен да побара стручна помош.

„Можеби за прв пат во мојот живот ќе ми треба. Поминав низ многу тешкотии во медиумите и во животот воопшто. Ми недостасува радоста во сè што правам. Тоа не е нужно во тенисот. Дури и кога победувам на натпревари, како во Штутгарт или Хале, тоа не е нужно чувството што го имав порано. Кога бев среќен до солзи и мотивиран да продолжам. Во моментов го немам. За прв пат во мојот живот го чувствувам ова“, призна германскиот тенисер со руско потекло.