Откако музичарот Нил Јанг побара неговата музика да се отстрани од Spotify поради „ширење лажни информации за вакцините“, се огласисија од музичката платформа и објавија дека неговата музика ќе биде отстранета, по спорот со Џо Роган.
„Сакаме целата светска музичка и аудио содржина да биде достапна за корисниците на Spotify. Со тоа доаѓа голема одговорност во балансирањето на безбедноста на слушателите и слободата на креаторите“, изјавија од Spotify за Washington Post. „Имаме детални правила за содржината и отстранивме над 20.000 епизоди на подкаст поврзани со COVID-19 од почетокот на пандемијата. Жал ни е поради одлуката Нил Јанг да ја отстрани неговата музика од Spotify, но се надеваме дека наскоро ќе ни се врати“, велат оттаму.
Јанг не сака да ја емитира својата музика на платформа на која подкаст на Џо Роган „шири дезинформации за вакцините против COVID-19“.
„Го правам ова затоа што Spotify шири лажни информации за вакцините што може да доведе до смрт на оние кои веруваат во тие дезинформации. Ве молам веднаш да делувате по ова барање“, напиша Јанг во писмото до неговата дискографска куќа и менаџерскиот тим.
„Веднаш да го известите Spotify дека сакам да ја отстрани мојата музика од таа платформа. Може да го имаат Џо Роган или Јанг. Не може и двајцата“, додаде тој во писмото.
Пред неколку недели, 270 лекари, научници, здравствени работници и професори напишаа отворено писмо до Spotify, изразувајќи загриженост за медицинските дезинформации изнесени на подкастот на Роган.
Здравствени експерти истакнаа дека Роган има големо влијание и укажаа на контроверзната епизода во која гостин беше Роберт Малоун, виролог и имунолог познат по низа контроверзни изјави во врска со COVID-19.
Роган има ексклузивен договор со стриминг сервисот, во 2020 година потпиша договор од 100 милиони долари што му даде на Spotify ексклузивни права за неговата емисија.
