Министерството за безбедност на Аргентина спречи завера во која било планирано да се искористи курирската служба на руската амбасада за шверц на кокаин во Европа.
Полицијата запленила речиси 400 килограми кокаин најдена во дипломатски багаж во анекс на амбасадата откако добила дојава од рускиот амбасадор во декември, 2016 година.
Потоа организирала тајна акција во која дрогата била заменета со брашно и во пакетите биле ставени направи за следење.
Како резултат на тајната операција биле уапсени осомничени во Аргентина и во Русија.
Аргентинската министерка за безбедност Патриција Булрих изјави дека кокаинот најден во амбасадата во Буенос Аирес има вредност од 50 милиони евра и е со висок квалитет.
Таа додаде дека целна дестинација била Русија и најверојатно Германија.
Булрих додаде дека човекот кој се сомничи дека бил „мозокот“ зад организираниот шверц се наоѓа во Германија и дека се очекува германските власти да го уапсат.
Досега се уапсени две лица во Аргентина и три во Русија.
Руските служби за безбедност соработувале во операцијата. Еден од уапсените во Аргентина бил полицаец во Буенос Аирес, а друг поранешен вработен во амбасадата, додаде министерката.