Един Џеко имал жестока расправија со соиграчот Стефан ел Шарави во соблекувалната, на полувремето од натпреварот на Рома против СПАЛ, пишува Corriere dello Sport.
На насловната страница на италијанскиот весник осамна приказната дека Џеко жестоко се расправал со Ел Шарави на полувремето од натпреварот што го губеше со резултат од 1:0.
Останатите играчи и тренерот Раниери наводно во последен миг спречиле расправијата да премине во физичка пресметка меѓу двајцата фудбалери.
„Многу луѓе интервенираа да се спречи расправијата меѓу Џеко и Ел Шарави да премине во боксерски меч“, пишува Corriere dello Sport.
Можно е двајцата фудбалери да бидат казнети кога ќе се вратат во Рим, но не е познато дали ќе бидат суспендирани или ќе поминат само со парични казни.
Наводно, причината за расправијата е банална – Ел Шарави непрецизно му додаде на Џеко, што дополнително го изнервирало капитенот на босанската репрезентација кој веќе бил нервозен.
Натпреварот заврши 2:1 во полза на СПАЛ.