Српскиот министер за здравство Златибор Лончар изјави дека очекува подобрување на денешниот пресек на состојбата со коронавирусот во земјата.
Тој додаде дека и да има подобрување, граѓаните не смеат да се опуштат.
Србија вчера забележа рекордни 325 нови случаи на коронавирус од 7.434 тестирања. Во 24 часа починаа 8 пациенти, а во земјата има 2.347 активни случаи.
Од почетокот на епидемијата во Србија се потврдени вкупно 15.829 случаи на коронавирус, починале 306 лица, а 13.064 се оздравени.
Пред два дена градоначалникот на Белград Зоран Радојчиќ, на предлог на Штабот за вонредни ситуации, донесе одлука за прогласување вонредна ситуација. Вонредната ситуација беше воведена поради спроведување на превентивни заштитни мерки и заштита на животите на населението во услови на пандемијата на COVID-19.
Белградскиот градоначалник прецизираше дека Одлуката се носи поради спроведување на процедурата за воведување на три нови мерки, со цел спречување на ширењето на COVID-19.
Српскиот претседател Александар Вучиќ најави дека парично ќе бидат казнети лицата кои нема да носат заштитни маски во трговските центри и јавниот градски и меѓуградски превоз. Ќе бидат затворени и студентските домови затоа што голем број студенти се заразени.
Бројот на луѓе собрани во затворено е ограничен на 100, на растојание и со маски, а на отворено на 500 лица.
Ситуацијата во Белград е најпроблематична затоа што повеќе од 82 проценти од сите заразени се регистрирани во главниот град на Србија.