Директорот на српската полиција Владимир Ребиќ изјави денеска дека во текот на дводневните протести се повредени 118 полициски службеници на кои им е укажана помош во здравствените установи во повеќе градови низ Србија, а синоќа се приведени 153 лица.
– Граѓаните и синоќа беа сведоци на неверојатни размери на насилство во Белград, туку и во Нови Сад, Ниш и Крагуевац. Такво насилство е неприфатливо и полицијата ќе ги преземе сите мерки со цел да го спречи насилството на улиците, а хулиганите ќе одговараат, истакна Ребиќ.
Тој додаде дека е причинета голема материјална штета, бидејќи демонстрантите го оштетиле имотот на граѓаните, како и јавниот имот.
– Уништуваа автомобили, прозорци, излози, палеа контејнери. Во Нови Сад се искршени стакла на Радиотелевизија Војводина и запален оган на влезот во Градската куќа, додека во Ниш и Крагуевац се уништени полициски автомобили и фрлани камења врз зградата на полициската управа во тие градови. Благодарејќи на координираната реакција на полицијата, успеавме да воспоставиме контрола на улиците во текот на ноќта, нагласи Ребиќ.
Ребиќ, меѓу другото, додаде дека на протестите можеле да се забележат и одредени политичари, кои „со тоа покажуваат дека поддржуваат насилство и немири на улиците“.
На социјалните мрежи се шират повици за продолжување на протестите во Белград, со слоганот „Седи доле!“, а исто така и во Нови Сад, Ниш, Чачак, Крагуевац, Нови Пазар и Зрењанин.
– Вечерва #СедиДоле бидејќи граѓаните кои не сакаат немири и судири треба да се одвојат од ангажираните групи хулигани, кои ќе предизвикаат судири!, напиша на својот Twitter профил политикологот Вук Велебит, чија идеја е мирните учесници на протестот да се дистанцираат од оние кои ја напаѓаат полицијата и предизвикуваат инциденти.
Повикот до сограѓаните вечерва во 18 часот да дојдат пред српскиот Парламент го сподели и лидерот на Движењето на слободните граѓани, Сергеј Трифуновиќ, нагласувајќи да облечат бели маици, со што ќе покажат дека „не се предавници и хулигани, а со тоа ќе се направи јасна дистанца меѓу полициските хушкачи и ние кои ќе дојдеме да изразиме незадоволство“.
Во Нови Сад, како што јави 021.рс, протестот ќе продолжи вечерва во 18 часот на Плоштадот Слобода.
„Јужни вести“, исто така, објавува дека протестите вечерва продолжуваат во Ниш, Врање и Лесковац, а организаторите им порачале на сите кои планираат да ја напаѓаат полицијата да не доаѓаат.
Најавено е дека од вечерва протестот ќе го обезбедува Синдикатот на војската и полицијата.
Жители на Нови Пазар преку социјалните мрежи од синоќа почнаа да ги повикуваат своите сограѓани да излезат на протест, кој неофицијално е закажан за вечерва во 19 часот во центарот на градот. Еден од организаторите на собирот е Ирфан Угљанин, кој во разговор за Нова.рс, истакнал дека станува збор за мирен протест, каков што им доликува на граѓаните од овој град, кои се наоѓаат во една од најтешките ситуации досега.
Твитерџиите од Чачак, исто така, споделуваат информација за вечерашниот протест.
На социјалните мрежи се појави и повик за протест во Зрењанин.
