Српскиот министер за одбрана Милош Вучевиќ во средата ги нарече „лаги“ информациите дека Србија испраќа оружје во Украина, како што објави Reuters повикувајќи се на тврдења од наводни документи објавени во Вашингтон.
Британската агенција претходно објави дека Србија, иако единствената земја во Европа која одби да се приклучи на санкциите против Русија за нејзината инвазија на Украина, „се согласила да испорача оружје на Киев или веќе го испратила“.
Reuters објави дека станува збор за доверлив документ на Пентагон во кој се сумирани одговорите на европските влади на барањата на Украина за воена обука, помош и оружје, и дека е меѓу десетиците доверливи материјали објавени на социјалните мрежи пред еден месец во она што се смета за најголемото протекување на американски тајни во последниве години.
Исто така, Reuters тврди дека не можел самостојно да ја потврди автентичноста на документот. Насловен „Европа/одговор на актуелниот конфликт Русија-Украина“, документот ги прикажува одговорите на 38 европски влади на барањата на Украина за воена помош.
Графиконот, според Reuters, покажува дека Србија одбила да обезбеди обука за украинските сили, но ветила дека ќе испрати помош во оружје или веќе ја испратила.
Српскиот министер за одбрана Милош Вучевиќ ги нарече лага информациите дека Србија ѝ испраќа оружје на Украина и оцени дека целта на ваквите тврдења е да се дестабилизира Србија и да се вовлече во конфликт кој не го сака.
„Србија не продала, ниту ќе продаде оружје на украинската или руската страна или на земјите околу тој конфликт“, рече Вучевиќ во средата за рускиот портал Спутник, а неговите пораки се речиси идентични во изјавата испратена подоцна до медиумите од Министерството за одбрана.
„Некој очигледно има за цел да ја вовлече Србија во овој конфликт, но ние постојано се држиме до нашата воспоставена политика“, рече Вучевиќ, инсистирајќи дека Србија неколку пати досега ги „негирала овие невистини“.
Тој изјави дека Србија „продава оружје на трети страни, кои се далеку од конфликтот и немаат никаква врска со тоа“, оценувајќи дека „секогаш постои можност некој некако да најде оружје на територијата на конфликтот“, но дека „ нема апсолутно никаква врска со Србија“.
„Ова е прашање за оние земји кои не ги почитуваат меѓународните норми, договорните клаузули и деловните принципи. Повторувам, Србија не испрати оружје во Украина и сè што беше објавено на таа тема е невистинита шпекулација“, изјави Вучевиќ за Спутник.
