Србија се врати од -24, ја победи Австралија и сега ги чека САД во полуфиналето

Српските кошаркари се пласираа во полуфиналето на турнирот на Олимписките игри во Париз, откако денеска во четвртфиналниот натпревар ја совладаа селекцијата на Австралија со 95:90.

Иако Србија подобро го отвори натпреварот, првата четвртина целосно ѝ припадна на Австралија која имаше 14 поени предност.

Во втората четвртина Австралија продолжи да погодува речиси сѐ што се обиде, па во еден момент предноста изнесуваше неверојатни 24 поени (44:20). Сепак, Србија успеа малку да се извлече, па до заминувањето на пауза ја намали негативата на минус 12.

Во продолжението од играта Србија се прероди и во средината на третата четвртина дури успеа да го сврти резултатот (61:60). До влегувањето во последната четвртина се играше главно кош за кош.

Во слично темпо се играше и во последната четвртина, во која Србија имаше константна минимална предност. Сепак, по драмата на крајот, брилијантниот Милс ја спаси Австралија и го одведе мечот во продолжение.

Следуваше нова драма во која Србија помина подобро и на крајот успеа да ги совлада упорните Австралијци и да избори пласман во следната рунда на олимпискиот турнир.

Најдобар кај Србија беше Никола Јокиќ кој имаше дабл-дабл со 21 поен и 14 скока, додека Богдан Богдановиќ постигна 15 поени. Кај Австралијците најдобар беше Пари Милс со 26 поени, а Џош Гиди постигна 25.

Србија во полуфиналето на олимпискиот турнир ќе игра против победникот од мечот помеѓу Бразил и САД (вечер, 21:30), а според сѐ вистински шок би било доколку тоа не биде Дрим Тимот.