Српските ватерполисти ја демолираа Црна Гора во последното коло од групата Б со огромни 14:5 и како трета репрезентација на групата во четвртфиналето ќе играат против актуелниот светски првак Италија.
Црна Гора, како четврта, за противници ги доби Грците. Да потсетиме, првото место во групата го освоија Шпанците, а второто Хрватска. „Фуријата“ оди против Американците, а Хрватска против Унгарците.
Српските медиуми пишуваат дека Црногорците калкулирале дека со пораз ќе ги избегнат Италијанците и дека таквиот висок пораз е последица на слабиот ангажман на црногорските играчи.
„Секој натпревар на овој турнир е важен, секој открива некои работи, а овој покажа дека сме на добар пат во однос на пристапот и одбраната“, рече српскиот капитен Филип Филиповиќ, а потоа се осврна на шпекулациите за калкулациите на Црна Гора.
„Не сакавме ништо да препуштиме на случајноста, од самиот почеток. Овој резултат е во втор план бидејќи беше јасно дека Црна Гора не сака да се бори до крај, како што тоа обично го прават кога играат против нас. Но, тоа е нивна работа“.