Шпански турист бил прегазен до смрт од стадо слонови во национален парк во Јужноафриканска Република, откако наводно се обидел да ги фотографира, пишува Guardian.
43-годишен маж почина во неделата наутро во националниот парк Пиланесберг, на околу 210 километри северозападно од Јоханесбург.
Според официјалните лица на паркот, човекот, кој бил со тројца пријатели, излегол од своето возило и тргнал кон животните за да ги фотографира.
„И покрај предупредувањата на неговите сопатници и сопатниците од другите две возила, тој излегол од возилото. Возрасна слоница се нафрлила на човекот, кој потоа почнал да бега. Тој не успеал да побегне, а целото стадо се приклучило и го прегазиле мажот до смрт“, се вели во соопштението на локалниот одбор за паркови и туризам.
Се додава дека слоновите потоа се оддалечиле без да покажат никаква агресија кон патниците во возилата.
Питер Нел, еден од службениците на одборот, изјавил дека слоницата се вознемирила од однесувањето на човекот кој се обидувал да ги фотографира нејзините младенчиња. Тој објасни дека е нормално слоновите да се обидуваат да ги одбранат своите младенчиња.
„Многу туристи не се свесни за опасноста и не разбираат колку овие животни можат да бидат опасни“, нагласи тој. Одборот соопшти дека на посетителите секогаш им се објаснува „опасната и непредвидлива“ природа на дивите животни.
„Туристите секогаш се едуцираат за важноста да се остане во возилото, да се почитува растојанието помеѓу возилото и животните, да се дозволи првенство на минување и да се излезе само на специјално одредени места“, забележува одборот.
Нападите од слонови не се невообичаени во регионот. Во 2021 година, слоновите убиле ловокрадец во националниот парк Кругер. Минатата година 50 луѓе беа убиени, а 85 повредени од диви животни, главно слонови, во соседно Зимбабве.
Шпанското Министерство за надворешни работи соопшти дека жртвата е од градот Сарагоса. Претставник на регионалната влада потврди дека конзуларниот персонал отишол на местото за да го извади телото на мажот и да го врати назад.
