Stellantis ја заврши првата половина од 2022 година на второто место кога станува збор за продажбата на електрични автомобили во Европа, надминувајќи ја Tesla и се најде зад Volkswagen.
Во првите шест месеци од оваа година, Stellantis продаде 105.413 електрични автомобили, со што лесно ја надмина Tesla, која продаде 78.277. Volkswagen Group и натаму е на првото место со 116.307 продадени возила. Проблемот за Tesla беа локдаун мерките во Кина кои влијаеа на производството во оваа земја.
„Се бориме за првото место на европскиот пазар“, изјави за Automotive News директорот на Stellantis, Карлос Таварес.
Продажбата на Stellantis Group е предводена од електричниот FIAT 500, кој беше најпродаваниот електричен автомобил во Италија и Германија во вториот квартал од 2022 година. Во првата половина од годината, Stellantis продаде 32.315 мали автомобили, што е зголемување за 72 отсто во споредба со истиот период во 2021 година.
Важен модел беше Peugeot e-208, кој беше продаден во 21.918 примероци, односно 11 отсто повеќе во однос на првата половина од минатата година. Хечбекот беше најпродаваниот електричен модел во Франција, а неговиот сестрински модел Opel Corsa продаде 13.380 примероци.
Кварталната продажба на Tesla падна на најниско ниво во последните две години, но тоа најмногу се должи на затворањето на фабриките, а не на падот на интересот на клиентите. И покрај сите предизвици, Model Y остана најпродаваниот електричен автомобил во Европа, со 39.969 примероци кои најдоа дом во првата половина на 2022 година. Зад него стои Model 3 со продадени 38.280 примероци, што бележи пад од 25 отсто во однос на истиот период минатата година.
Сепак, поголемиот дел од ограничувањата во Кина се укинати, па се очекува да се зголеми продажбата на автомобили на Tesla во втората половина од оваа година.
Stellantis имаше подобра продажба во вториот квартал од годината во однос на првиот, што значи дека расте и во желбата да го преземе тронот во Европа.