Денеска македонската репрезентација комплетна одржа тренинг откако во текот на денот пристигнаа и Пандев, Несторовски, Барди и Димитриевски.
Во тренинг центарот при Куќата на фудбалот во скопската населба Ново Лисиче, македонските репрезентативци го одржаа првиот сериозен тренинг во пресрет на саботниот натпревар со Австрија во Виена. Последени денес се приклучија калчаторите Горан Пандев и Илија Несторовски, како и „Шпанците“ Енис Барди и Столе Димитриевски.
Помеѓу сите играчи се наоѓа и едно 19-годишно момче. Тоа е централниот дефанзивец на Вардар, високиот Марио Младеновски кој по вторпат е со репрезентацијата откако беше повикан и минатиот месец. Тогаш не настапи, а сега се надева дека селекторот Игор Ангеловски ќе му даде шанса, макар од клупата, да дебитира.
„Чест е ако добијам шанса на еден од двата натпревара. За еден млад фудбалер многу значи ако добие прилика да игра пред полн стадион. Во овие два меча треба да влеземе максимално мотивирани за да ги добиеме. Првиот меч со Австрија ќе биде тежок, имаат одлични фудбалери, но ние ќе се обидеме да го дадеме максимумот“, изјави Младеновски за ФФМ.
