„Јас сум горд што сум капитен на овој тим. Првиот македонски ракометен тим во машка конкуренција што ја освои Лигата на шампионите“, рече по вчерашниот натпревар Стојанче Стоилов, капитен на РК „Вардар“.
Ракометарите на Вардар синоќа ја освоија титулата во Лигата на шампионите, откако во драматичното финале го совладаа ПСЖ 24:23 (11:12). Слично како и во полуфиналето, Вардар славеше со гол во последната секунда, кој го постигна Иван Чупиќ, кој ја одбрани титулата, бидејќи лани беше најдобар со Кјелце.
Според Стоилов, ракометарите покажале карактер и огромна храброст.
„Знаевме дека ќе биде исто како во полуфиналето, знаевме што треба да правиме, се боревме цел натпревар, одбраната беше пресудна. Се надеваме дека израдувавме цел град и цела Македонија“, порача Стоилов.
„Вардар израсна во многу голем колектив, голем тим. Гиневме сите еден за друг во текот на целата сезона. Иако малку нè потценуваа, на крај покажавме, четири титули во една сезона“, рече ракометарот на Вардар Игор Карачиќ.
Тој мечот го следеше од клупата, но додаде дека сите играчи одиграле брилијантно.
„Играчите беа супер, имаа желба да играат и кога требаше да играат мудро, го направија тоа“, рече по мечот тренерот на Вардар Раул Гонзалес, кому ова му е прв трофеј како тренер.
„Имавме многу среќа, но се трудевме четири години да влеземе во Ф4. Ние сме шампиони, цела Македонија да биде горда“, порача Гонзалес.