Ризикот едно лице да се зарази со коронавирусот е значително помал по примaње на една доза од вакцините на AstraZeneca и Pfizer, покажа британско истражување.
Вакцината дала добар одговор кај луѓе постари од 75 години и кај луѓе кои имаат хронични болести, како и кај други лица, јави BBC.
Британската Служба за национална статистика (ОНС) и Универзитетот во Оксфорд утврдија уште посилен имунолошки одговор кај сите луѓе по две дози.
Истражувачите, поделени во две студии кои сè уште не се прегледани и објавени, ги темелеле своите резултати врз основа на тестови за коронавирусот кај 370.000 луѓе во Велика Британија, што е најголемата студија досега.
Во првата студија, луѓето кои биле вакцинирани со една доза на AstraZeneca или Pfizer имале 65 проценти помали шанси да се разболат од COVID-19.
Три недели по првата доза, почнувајќи од декември 2020 година и почетокот на април 2021 година, бројот на симптоматски инфекции паднал за 74 проценти, додека бројот на асимптоматски инфекции паднал за 57 проценти.
Луѓето кои примиле две дози на Pfizer имаат 90 проценти помали шанси да бидат заразени со коронавирусот, но процентот не може да се утврди за AstraZeneca затоа што малку луѓе учествувале во студијата, со оглед на тоа што интервалот меѓу двете дози е 12 недели, а и вакцинирањето со овој лек почна подоцна.
Студијата покажа дека и двете вакцини се ефикасни против британската мутација на коронавирусот.