Луѓето кои се опоравуваат од последиците од COVID-19 можно е да претрпат сериозно оштетување на мозочните функции, а во најлоши случаи може да се појави штета еквивалентна на нагло стареење на мозокот за десет години, предупредија денеска истражувачите од Кралскиот колеџ во Лондон.
Студијата сè уште не минала рецензија и е спроведена на 84.285 оздравени пациенти од COVID-19.
Истражувачкиот тим е предводен од Адам Хемпшир кој рече дека во некои тешки случаи, COVID-19 предизвикува сериозни когнитивни дефицити во текот на неколку месеци.
„Нашите анализи се совпаѓаат со претходно утврдени факти дека има хронични когнитивни последици како резултат на COVID-19. Луѓето кои се опоравиле, дури и оние кои веќе не пријавуваат дека имаат проблеми, покажаа значителен когнитивен дефицит“, рече тој.
Тестовите за утврдување на можна штета се идентични со оние што се користат за Алцхајмерова болест, така што пациентите кои се опоравуваат од COVID-19 решаваат загатки или се обидуваат да поврзат точки користејќи логика.
Во извештајот на Кралскиот колеџ се наведува дека некои пациенти на возраст меѓу 20 и 70 години, кои имале тешки симптоми, развиле оштетување на мозокот како мозокот да им остарел десет години, без да се прецизира процентот на луѓе на кои тоа им се случило.
Неврологот Џоана Вардлоу, професорка на Универзитетот во Единбург, рече дека засега ќе ги прими резултатите од студијата со доза на резерва.
„Не ги знаевме когнитивните функции на учесниците во студијата пред да заболат од COVID-19, а резултатите не мора да значат дека штетата е трајна. Ова значи дека ‘стареењето’ на мозокот можно е да трае кратко, односно мозокот да се врати во нормална состојба по некое време, вели Вардлоу.