Фудбал

Суарес и Меси приредија шоу во Тел Авив

19. ноември 2019 - 8:37 | Ф.З.

Колегите од Барселона еден против друг забележаа идентичен ефект, по една асистенција и еден гол во натпревар во кој Аргентина и Уругвај одиграа 2:2.

На неутрален терен на стадионот „Блумфилд“ во израелскиот град Тел Авив, силите ги одмерија соседите и лути јужноамерикански ривали Аргентина и Уругвај.

„Сините“ поведоа преку Единсон Кавани во 34-тата минута откако Луис Суарес мајсторски му сервираше „на тацна“. Уругвајците водеа сѐ до 63-тата минута кога Лео Меси од слободен удар го пронајде Серхио Агуеро во казнениот простор каде играчот на Манчестер Сити со глава го совлада Мартин Кампања.

Израмнувањето на Аргентинците траеше кратко бидејќи само пет минути подоцна Луис Суарес на публиката во Тел Авив ѝ приреди вистинска мајсторија од слободен удар.

Кога се чинеше дека Уругвај ќе забележи победа, во судиското надополнување Мартин Касерес играше со рака и „Албиселесте“ добија пенал. Меси ладнокрвно погоди од белата точка за конечни 2:2.

Коментирај