Во текот на изминатата недела се пишуваше многу за англискиот судија Мајк Дин, еден од судиите со најдолг стаж во Премиер лигата.
Дин (52) минатиот вторник му додели црвен картон на стоперот на Саутемптон, Јан Беднарек, по консултација со ВАР. Во саботата на ист начин го казни играчот за врска на Вест Хем, Томаш Соучек. Многумина не се согласија со неговите одлуки, а лигата ги поништи суспензиите на играчите, верувајќи дека нема „материјал“ за црвен картон во нивните фаули.
Некои сепак претераа. Дин се пожалил дека по црвениот картон за Соучек, тој и неговото семејство биле малтретирани на социјалните мрежи и дека добил закани по живот. Затоа, тој побара од Премиер лигата да го поштеди и да не суди на ниту еден натпревар викендов.
И покрај ова, Дин следната среда ќе суди на натпревар од ФА Купот помеѓу Лестер и Брајтон, но нема да го гледаме на натпреварите од оваа недела во Премиер лигата.
Мајк Дин суди на највисок ранг во англискиот фудбал од 2000 година, а пред две години стана првиот судија што покажал 100 црвени картони во Премиер лигата.