Вистинска драма се случувала на третолигашкиот натпревар во Голема Речица каде главниот судија со брза интервенција спасил живот на млад фудбалер.
Како што известува M»Net телевизија, во 51. минута играчот со број 6 од редовите на домашната Речица, Блертон Шабани (според записникот), по удар на топката со глава лошо паднал удирајќи со главата в земја, по што загубил свест.
Главниот судија Дарко Радески од Брвеница веднаш го забележал тоа и притрчал во помош, среќа навреме за да му го извади голтнатиот јазик.
Со Шабани потоа сѐ било во ред, а според записникот од натпреварот не бил заменет и продолжил да игра. Тој во октомври ќе наполни 20 години.
Инаку, натпреварот завршил со победа од 1:0 на гостинската екипа Доброшти од селото Доброште.
