Првиот рекет во светот не доби можност да игра на Австралија опен иако имаше виза и медицинско ослободување.
Новак Ѓоковиќ беше депортиран од Австралија пред почетокот на Австралија опен, а во тој момент причините за таквата одлука не беа баш јасни. Сега ситуацијата е малку појасна, бидејќи Федералниот суд, институцијата што одлучуваше за овој случај, конечно се огласи.
Тричлениот судски совет ја прифати одлуката на министерот за имиграција, Алекс Хок, да му ја укине визата на Новак Ѓоковиќ и да го испрати во Србија, но моравме да почекаме неколку дена за да дознаеме зошто тоа се случило. Во меѓувреме за случајот зборуваа и адвокатите.
Според соопштението на судот, Новак со својот пример можел лошо да влијае на младите.
„На министерот му беше јасно дека Ѓоковиќ одлучи да не се вакцинира и може да заклучи дека јавноста ќе го разгледа неговиот став против вакцинацијата. Светската ѕвезда потоа може да влијае врз младата популација да го имитираат и да ги охрабри да не се вакцинираат“, наведува судот.
Според нив, одлуката на министерот е поткрепена со докази.
„Министерот Хок беше свесен за фактот дека ќе има немири во заедницата доколку Ѓоковиќ остане“.
Во оваа изјава се тврди дека министерот детално ја образложил својата одлука, иако тоа со закон не морал да го направи.
„Несомнено е дека во врска со прашањето од големо јавно значење, се посвети внимание на формулирање на причините во четирите дена во кои министерот требаше да ја разгледа работата и да ги дополни и достави причините. Сепак, одредена тежина треба да му се даде на фактот дека немаше обврска да се даде причина за одлуката. Имаше јасна меѓусебна поврзаност на сите делови од причините на министерот. Темите за охрабрување и имитирање на спортскиот херој и икона се провлекуваат низ причините за грижа за здравјето и редот, јавниот интерес“, стои во дел од сеопфатното соопштение.
Исто така, судиите заклучија дека основата за ваквата одлука на министерот е рационална и логична.
„Министерот го има овој став врз основи за кои не може да се каже дека се ирационални или нелогични или не се засновани на релевантен материјал“.
Отвореното првенство на Австралија деновиве се игра без првиот носител, па најголеми фаворити за трофејот се Даниил Медведев, Александер Зверев и Рафаел Надал.