Судот во Калифорнија ја отфрли тужбата на главните актери во филмската адаптација „Romeo and Juliet“ од 1968 година против Paramount Pictures поради сцена во која нивните ликови се будат голи во кревет заедно, пренесува The New York Times.
Актерите Оливија Хуси и Ленард Вајтинг во тужба поднесена минатата година тврдеа дека режисерот на филмот, Франко Ѕефирели, ги уверил дека ќе носат долна облека во месо боја за сцената во спалната соба. Во тоа време и двајцата биле малолетни. Но, утрото на снимањето, тврдат во тужбата, тој сепак им рекол дека „мора да бидат голи или филмот ќе пропадне“.
Тие исто така тврдеа дека Paramount Pictures, дистрибутерот на филмот, знаел или требало да знае дека снимката од нивните голи тела е незаконски добиена. Во судските документи адвокатите на актерите навеле дека сцената се квалификува како детска порнографија. Хаси имала 16 години кога се снимал филмот, а Вајтинг 17.
Актерите, кои сега се во своите 70-ти, планираат да се обратат до повисок суд.
Адвокатот на Paramount Pictures го оспори тврдењето на актерите. Тој тврдеше дека сцената не била ласцивна и инсистира на тоа дека поминало премногу време од настанот.
„Филмот не е детска порнографија. Тоа го докажува фактот дека е исклучително познат, дека е во дистрибуција веќе 55 години и дека го гледале или поседувале милиони Американци, без никакво претходно тврдење од органите на прогонот, обвинителите или нивните родители дека тоа е детска порнографија“, заклучи адвокатот на Paramount Pictures, Ричард Кендал.
Судијката во округот Лос Анџелес, Алисон МекКензи, рече дека ќе ја отфрли тужбата на актерите со образложение дека нивниот приказ во филмот не може да се смета за детска порнографија и дека тие ја поднеле тужбата предоцна.
Инаку, филмот за кој станува збор е награден со два Оскара.
