Фудбалерките на Челси стигнаа до полуфиналето на Лигата на шампиони победувајќи го Лион во два натпревари, а херој на лондонскиот тим е голманката Ен-Катрин Бергер.
Бергер од синоќа е на насловните страници на бројни англиски медиуми, а на социјалните мрежи ја нарекуваат „супержена“. Таа синоќа одбрани два клучни пенали во пенал-рулетот против Лион и го одведе својот тим во полуфиналето на Лигата на шампионите, а ништо немаше да биде необично доколку ова не се случеше откако со години се бореше со тешка болест.
Бергер (32) двапати во животот го победи ракот на тироидната жлезда. Пред само седум месеци беше на хемотерапија, но не се откажа, туку ја победи болеста и блесна на фудбалскиот терен.
Ракот се вратил кај германската фудбалерка четири години откако за прв пат ја доби битката на животот. Тоа го потврдила во август, по што се посветила на лекување.
Неколку месеци подоцна таа се врати на терените, а сега го водеше својот клуб до полуфиналето на Лигата на шампионите.
„Таа е човек кој цвета во големи моменти. Тоа го прави цела кариера. Таа е веројатно најдобрата голманка на пенали со која сум работела, па почувствував голема самодоверба кога дојдоа пеналите", изјави нејзината тренерка Ема Хејс.
Самата Бергер нема проблем да зборува за болеста и верува дека нејзините искуства можат да им помогнат на другите кои се борат со истиот предизвик.
„Всушност, навистина сакам да зборувам за тоа. Тоа е тема за која некои луѓе не сакаат да зборуваат, но мислам дека од моја позиција можам да им помогнам на другите. Не седам овде кажувајќи дека сè беше лесно, затоа што не беше, без разлика кој бил вашиот главен фокус, а мојот фокус беше да се вратам на фудбалот, тоа може да ви помогне да го постигнете она што го сакате. Затоа мислам дека е многу важно да се биде отворен. Јас победив, па зошто да не можат сите други“, рече искусната голманка.
