Поради недосудениот очигледен пенал во корист на Интер суспензија доби главниот судија, како и оној од ВАР собата кој „заборави“ да интервенира.
„Интервенцијата на Балог над Перишиќ е пенал кој е очигледен и требаше да се досуди. Во ваков случај ВАР требаше да интервенира“, вели познатиот поранешен судија Никола Рицоли, сега делегат на судиите во Серија А.
При таа ситуација главниот судија Марко Пичинини одмавна со раката, а не интервенираше ниту ВАР собата каде на чело беше Фабио Мареска. Сега двајцата за казна добија суспензија и деградација во Серија Би. Во Серија А веројатно ќе се вратат со судење во декември, ако бидат назначени.
„Перишиќ е пред дефанзивецот, нема сомнеж дека противникот користи раце и тоа на начин кој е казнив и предизвикува фаул за кој се суди пенал. ВАР мора да ги бара објективните ситуации. А тука од објективност е динамиката и рацете кои се на рамената на Перишиќ, со што го спречува играчот да скокне“, објаснува некогашниот најдобар европски судија.
При едно нафрлување Иван Перишиќ беше спречен да скокне и со глава да проба да го загрози голот на Парма, но судиите останаа неми.
Интер одигра 2:2 со Парма, па од суспензијата на судиите и нема никаква корист бидејќи штетата е веќе направена.