Екипата на Сузуки објави денеска дека сака да го напушти Мото ГП на крајот на оваа сезона, додавајќи оти преговара за тоа со Дорна, која е промотор на натпреварувањето за Светското првенство во мотоциклизам.
Во официјалното соопштение издадено пред трката за Големата награда на Франција, јапонскиот производител Suzuki истакна дека причина за ваквиот чекор е од финансиска природа, и оти компанијата разгледува целосно повлекување од натпреварувачката програма.
„За жал, актуелната економска состојба и потребата за концентрирање на своите напори на големите промени со кои се соочува автомото светот изминатите години го принудуваат Suzuki на драстично намалување на трошоците поврзани со натпреварувачката програма“, се наведува во официјалното соопштение, во кое се додава дека компанијата сака „сите своите економски и човечки потенцијали да ги користи за развој на нови технологии“.
Дорна минатата недела го потсети Suzuki дека не може да донесе еднострана одлука, бидејќи јапонската компанија лани го продолжи договор за настап во Мото ГП до крајот на 2026 година.
