Иако навреме беа воведени сите мерки за спречување на ширењето на коронавирусот, оваа јужноамериканска земја сега се вбројува меѓу најтешко погодените во пандемијата со COVID-19 досега.
Главната причина за ова е сиромаштијата што владее во Перу, објави CNN.
Перу беше една од првите земји во Јужна Америка што презеде строги мерки за превенција од ширење на коронавирусот, како забрана за излегување од домовите, полициски час и затворање на границите.
Денеска во земјата има над 123.900 потврдени случаи на заразени и над 3.600 мртви од COVID-19. Меѓу јужноамериканските држави, Перу е на второ место по број на заразени и починати од вирусот, веднаш зад Бразил.
Официјалните податоци покажуваат дека околу 85% од респираторите во Перу се зафатени, а медицинските експерти стравуваат дека се заканува колапс на здравствениот сектор кој нема да може да одговори на кризата предизвикана од пандемијата.
Перуанскиот лекар Елмер Хуерта за CNN изјави дека една најголемата причина за ваквата ситуација е големата сиромаштија и социјална нееднаквост во земјата. Многу луѓе немаат избор и мора да излегуваат од дома и да работат, а условите во повеќето домови не дозволуваат одржување на социјална дистанца. Според податоците од 2017 година, само 49% од домаќинствата во Перу имаат фрижидер, па луѓето мораат речиси секојдневно да излегуваат и да одат во продавница по намирници што лесно се расипуваат бидејќи нема каде и како да ги чуваат.
Редици и метеж се создава пред продавниците, банките и местата каде државата дели социјална помош, невозможно е да се одржува физичка дистанца, а повеќето луѓе не носат маска бидејќи не можат да си ги дозволат.
Неможноста да се одржи дистанца во домовите и работните места дополнително ја влошува ситуацијата. Повеќе од 30% од семејствата живеат во мал простор, па така во една соба спијат четири и повеќе лица.
Сето ова создава опасна комбинација за ширење на заразата со коронавирусот во Перу, стравуваат експертите.