Повеќе од 60 години се нема случено на Светското првенство во фудбал да има олку долга низа на натпревари без резултат 0:0.
Мундијалот во Русија го одбележуваат неочекувани резултати, скандали во репрезентациите и слични куриозитети, но овој резултатски „деликатес“ им годи на сите, особено на фановите.
Од првиот натпревар Русија-Саудиска Арабија на 14 јуни, па сѐ до денес, 25 јуни, уште се нема одиграно меч без голови на Мундијалот.
Во меѓувреме се одиграа две кола од групната фаза и на секој натпревар „падна“ барем по еден гол. Досега изгледавме 32 натпревари на кои беа постигнати вкупно 85 погодоци.
Поединечно гледано, убедливо најефикасна е групата Г во која после голеадата на Белгија, и Англија даде многу голови на еден натпревар, па има вкупно 20 голови во четири натпревари. Најмалку голови беа постигнати во грпа Ц каде Франција два пати победи со гол разлика, а Данска еднаш.
Сѐ заедно го прави овој Мундијал еден од најефикасните и најзанимливите, што го потврдува и историјата, бидејќи Светското првенство во Русија бележи најдолго време во кое не е одигран ниту еден меч без голови.
Последен пат ваква „нула“ имаше во далечната 1954 година, кога на ниту еден натпревар од 26 натпревари во Швајцарија немаше резултат 0:0.
