Тестирањата на лекот против маларија хидрохлорокин како можна терапија за коронавирусот се прекинати поради загриженост околу неговата безбедност по здравјето, соопшти Светската здравствена организација (СЗО).
Клиничките испитувања со овој во лек се „привремено“ суспендирани како мерка на претпазливост, велат од СЗО. Веста следи откако најново медицинско истражување укажа дека лекот може да го зголеми ризикот од смртност кај пациентите со COVID-19.
Американскиот претседател Доналд Трамп претходно изјави дека го зема лекот „превентивно“ и во неколку наврати го промовираше лекот против маларија, наспроти лекарските совети и предупредувања од здравствените служби дека може да предизвика проблеми со срцето.
Минатата недела во медицинскиот журнал The Lancet беше објавен извештај од истражување во кој се вели дека не само што нема докажани позитивни ефекти од давање хидрохлорокин како терапија на болни од COVID-19, туку дури може да се зголеми бројот на смртни случаи меѓу хоспитализирани пациенти со оваа болест.
Хидрохлорокинот е безбеден за користење кај болни од маларија и состојби како лупус и артритис, но во контролирани услови и по препорака на лекар. Досега нема клинички испитувања што докажале дека е ефикасна терпаија против COVID-19.
СЗО привремено ги суспендира сите клинички испитувања со овој лек додека трае процесот на проверка и проценка на неговата безбедност по здравјето кај пациенти со COVID-19.
Во истражувањето на The Lancet беа вклучени 96.000 пациенти со COVID-19, при што на 15.000 од нив им бил даван хидрохлорокин или хлорокин, самостојно или во комбинација со антибиотик.
Истражувањето покажа дека пациентите имале поголем ризик да умрат во болница или да развијат компликации на срцева аритмија во споредба со другите пациенти во контролната група.
Стапката на смртност во групите била: со хидрохлорокин 18%, хлорокин 16,4% и контролна група 9%. Кај оние пациенти кои добивале комбинираната терапија од хидрохлорокин/хлорокин со антибиотик стапката на смртност била уште повисока.