Светската здравствена организација (СЗО) внимателно ќе го проучи кинеското истражување за новиот свински грип, изјави нејзиниот портпарол, додавајќи дека наодите укажуваат на важноста за набљудување на овој вирус во време на пандемија на COVID-19, пишуваат британските медиуми.
„Новиот вирус, откриен кај свињите во Кина, станува сѐ позаразен за луѓето, а ситуацијата во овој случај мора внимателно да се следи во случај вирусот да стане потенцијална пандемија“, се наведува во истражувањето.
СЗО соопшти дека внимателно ќе ја проучи студијата и дека ќе остане будна во врска со ситуацијата со грипот и дека соработката и размената на информации во овој поглед е од огромно значење.
Новиот вирус, откриен од кинески научници, е сличен на свинскиот грип, но има некои разлики. Истражувачите го нарекоа G4 EA H1N1 и велат дека може да се сместува и да се размножува во клетките, што ги покриваат дишните патишта на човекот.
Вирусот е пронајден кај работници во кланиците во Кина. Сегашните вакцини против грип не штитат од него, но експертите велат дека вакцините може да се модифицираат и да понудат заштита од G4 ЕА H1N1.