Светската здравствена организација објави нови препораки за лекување на пациентите заболени од COVID-19. Меѓу останатото, се советува употреба на антикоагуланси во мали дози за да се спречи згрутчување на крвта.
„Според новите препораки, заразените луѓе дома би требало да користат пулсна оксиметрија за мерење на нивото на кислород, за да може да се следи дали состојбата им се влошува и дали е подобро да имаат болничка нега“, изјави Маргарет Харис од СЗО на брифингот на ОН во Женева.
СЗО исто така советува пациентите да лежат на стомак за да го подобрат протокот на кислород.
„Препорачуваме и употреба на антикоагуланси за спречување на крвни згрутчувања. Предлагаме помали дози бидејќи поголемите можат да предизвикаат други проблеми“, изјави Харис.
Таа одби да коментира за доцнењето на вакцини во Европската Унија, велејќи дека нема конкретни податоци.
Истакна дека приоритет е вакцинирањето на здравствените работници во сите земји во првите 100 дена во годината, пренесе Reuters.